පියාඹන පීරිසි සහ ජීවයේ පැවැත්ම - ජයරත්න කොඩිප්පිලි

    “ වලාකුළුවලින් තොර අහසේ තාරකා එක දෙක දිදුලන්නට පටන් ගත්තා..... මිනිත්තු කිහිපයකට පෙර පැවති සිහින් මිහිදුම් පටලයත් කදු අතරින් නොපෙනී ගිහින්..... සද එළියෙන් මුළු පෙදෙසම නැහැවිලා..... එකවරම පුංචි රිදී පැහැ වස්තුවක් කදුපෙළ අතරින් මතුවුණා..... දුම් දැමීමකින් හෝ ශබ්දයකින් තොරවම එය උතුරැ දෙසට ඇදිලා ගියා..... ඇත්තෙන්ම එහි ප්‍රමාණය ගැන කියන්න අමාරැයි..... ඒ වගේම ඒක කොතරම් ඉහළින් ගමන් කළාද කියන්නත් බැහැ..... සමහරවිට මීටර් දෙසීයක් විතර වෙන්න ඇති..... ඒ වුණාට ඇත්තම වස්තුවක් අහසේ ගමන් කළ බව නම් මට විශ්වාසයි..... ඇත්තටම ඒ වගේ වස්තුවක් මම මීට පෙර කිසි දවසක දැකලා නැහැ..... ඒකෙන් නිකුත් වුණේ අමුතුම ආලෝකයක්..... සුදුම සුදුයි..... නැහැ..... ප්ලොරසන්ට් බල්බයක වගේ නිලට හුරැ සුදු එළියක්..... හරිම දීප්තිමත්..... තවත් මොහොතකින් එය අධික වේගයෙන් ඉහළට ඇදිලා ගිහින් නොපෙනී ගියා.....”

   

      මෙය හදුනා නොගත් පියාසර වස්තු පිළිබද එක් වාර්තාවක් පමණි. මෙය සත්‍ය සිදුවීමක් ලෙස ඔබට පිළිගත හැකි ද? පිළිගන්නේ නම් ඒ සදහා පදනම් කරගනු ලබන කරැණු මොනවා ද? පිළිනොගන්නේ නම් එයට හේතුවන කරැණු මොනවා ද? නිවැරදි පිළිතුරක් ලබා දීම සදහා  ඔබට මෙම කෘතියෙන් යම් පිටිවහලක් ලැබෙනු ඇත. 

     ඈත අතීතයේ සිටම මිනිසා අහසේ දිස්වන අද්භූත වස්තු පිළිබද ව විමසිලිමත් විය. එමෙන්ම එම අපූරැ දසුන් පිළිබද විවිධ අර්ථකථන සපයනු ලැබී ය. උල්කා සහ ධූමකේතු පිළිබද ව පැවති මිත්‍යා විශ්වාස නූතන අනාවරණය කිරීම් හමුවේ මිනිසා වෙතින් බැහැර වෙමින් පවතී.

      එ‍හෙත් ලොව නන්දෙසින් වාර්තාවන අභිරහස් යානා පිළිබද ව නිවැරදි පහදා දීමක් මෙතෙක් සිදු වී නැත. මේවා සත්‍ය වශයෙන්ම පිටසක්වළ සිට පැමිණෙන යානා විය හැකි ද? එ‍සේ නැතහොත් මේවා කිසියම් ආකාරයක දෘශ්ටි මායාවන් ද? උගත් බුද්ධිමත් පුද්ගලයින් විසින් ඉදිරිපත් කරන ලද දසුන් පිළිබද වාර්තා සිය ගණනක් වෙයි. එවැනි වාර්තා සම්පූර්යෙන්ම ප්‍රතික්ෂේප කළ නොහැකි ය.

     ජීවයට අත්‍යවශ්‍ය සාධක පවතින්නේ පෘථිවිය මත පමණක් නොවන බව විද්‍යාඥයින්ගේ මතය වේ. එසේනම් විශ්වයේ ජීවය පවතින එකම ස්ථානය පෘථිවිය පමණක්ය යනුවෙන් සැලකිය නොහැකි ය. එවැනි පිටසක්වළ ජීවීන් සිටින්නේ නම් ඔවුන් අතර බුද්ධිමත් ශිෂ්ටාචාර පැවතීමේ හැකියාව ද බැහැර කළ නොහැකි ය. සමහරවිට මිනිසාට වඩා ඉදිරියට ගිය ශිෂ්ටාචාර ද පැවතිය හැකි ය. අසීමිත දුර ප්‍රමාණ තරණය කිරීමට අප තවමත් අපොහොසත් වුවත් එය ජයගැනීමට සමත් බුද්ධිමත් ජීවීන් සිටිය නොහැකි බව අපට පැවසිය නොහැකි ය.

     විශ්වයේ ජීවීන්ගේ පැවැත්ම පිළිබදව සොයා බලන වැදගත් පර්යේෂණ විවිධ ක්ෂේත්‍ර ඔස්සේ මේ වන විට පැවැත්වෙයි. මෙම පර්යේෂණ වල ප්‍රතිඵල තුළින් පිටසක්වළ ජීවීන් පිළිබද සත්‍යය හෙළිදරව් කරගත හැකි වනු ඇත. මේ අතර පෘථිවිය මත ජීවයේ පැවැත්ම පිළිබද අර්බුදයන් ද නිර්මාණය වෙමින් පවතී. මිනිසා විසින් එම ගැටලු වලට ද වහා විසදුම් සොයාගත යුතු වේ.  

මිල රැ. 200/=                                                                          ISBN 978-955-99030-3-1